सद्यस्थितीला अनुसरून

⁠⁠⁠१.
कुत्र्याचा मूत जसं वघळ धरून रस्त्याच्या कडंला जातंय तसं कुसळधार पाऊस पडायलाय, अन चायनेलवाले त्याला बी मुसळधार पाऊस म्हणून दाखवायलेत अन हवामान खत्यावाले शेतकऱ्यास्नी पेरण्या करा म्हून संगायलेत! शेतकऱ्याला हे समदे चायनेलवाले अन हवामानवाले च्युत्याच समजत्यात का काय?
२.
यंदा कोणतंच चायनेल वारीचं कव्हरेज घ्यायलेलं दिसनां झालंय!
अन पावसाच्या आशेनं गावातूनबी यावर्षी वारीला जाण्यात कुणाला लय इंटरेस्ट दिसनां झालाय! देव पावतंय वाटालंय यंदा!!
३.
मराठवाड्यातला पाणीसाठा निव्वळ १% च शिल्लक राह्यला म्हणून चायनेलवाले बम्बलूलालेत, तरीबी वरून दुष्काळ प्याकेज काय यीना झालंय! बंद पडायलेल्या कारखान्याला तर लगेच प्याकेज यायलंय!
४.
तिकडं रघुरामनं राजीनामा दिल्यानं आता देशाची अर्थव्यवस्था बुडल का काय असंच सगळ्या चायनेल वाल्याना अन शिकलेल्या लोकास्नी वाटायला लागलंय! शेतकरी बिचारा यंदा म्हसरं जगतेल का मरतेल म्हून येणाऱ्या जाणाऱ्या वांझोट्या ढगाकडं टक लावून बघत बसलाय!
५.
लातूर उस्मानाबाद बीड वाल्या शेतकऱ्यास्नी मागच्या खरीपाचा पीक विमा मिळालाय खरा पण अजून अकौंटात काय जमा नाय झाला! त्याच्याच जोरावर यंदा खत बी उधार आणून ढाळजंत टाकलंय! तिफण, कासरा, रासनी, वटा समदं तयार करून ठिवलंय खरं वल काय चार बोटाच्या खाली जाईना झालीय अजून!

महेश हाऊळ
२० जून २०१६